Ek wil graag van hierdie geleentheid gebruik maak om myself voor te stel as die nuwe Minimense tannie in Worcester. My grootste droom was en is steeds om die beste mamma te kan wees vir my twee kinders. Wat ’n voorreg is dit nie om die groei en ontwikkeling van kinders te aanskou nie! As ’n mamma weet ek dat daar baie uitdagings in vandag se tye is en daarom sê ek altyd: “Die beste geskenk wat jy vir jou kinders kan gee is jou tyd en liefde.”

Ek sal myself beskryf as ’n lojale en liefdevolle persoon. My geaardheid is van so aard dat ek maklik met ander mense oor die weg kom. Ek het ’n passievolle roeping om ’n kind se wêreld te verstaan en hulle tot hulle volle potensiaal te help ontwikkel.

Ek het my Baccalaureusgraad in Opvoedkunde (Intermediêre fase) voltooi deur Unisa. My liefde vir Minimense het ontstaan toe ek my eie seuntjie geneem het om deel te word van die Minimense werkswinkel in Caledon.